CMATI

Vostede está en:
|
|
|
Compartir

A Xunta salienta o papel clave dos portos na defensa da saúde de mares e océanos e para a protección da costa

Ángeles Vázquez incide en que a erradicación do lixo mariño é un dos maiores retos ambientais da sociedade actual e pon en valor iniciativas como Upcycling the oceans, na que colaboran o seu departamento e o porto coruñés, entre outros, desde hai cinco anos

A Coruña, 5 de xuño de 2023 A Xunta puxo en valor hoxe o papel clave e imprescindible que xogan os portos na defensa da saúde de mares e océanos fronte ás ameazas que supoñen a contaminación por residuos e outros factores relacionados co cambio climático, e tamén para garantir a protección da franxa costeira.

Así o subliñou esta mañá na Coruña a conselleira de Medio Ambiente, Territorio e Vivenda, Ángeles Vázquez, quen inaugurou a exposición de carácter divulgativo Diálogos Humboldt, organizada pola Autoridade Portuaria coruñesa e o Centro de Extensión Universitaria e Divulgación Ambiental de Galicia (Ceida) co fin de dar a coñecer a figura do científico Alexander Von Humboldt e a súa histórica expedición desde a cidade herculina a América.

Tras lembrar que a inauguración coincide co Día Mundial do Medio Ambiente, dedicado este ano á contaminación por plásticos e as súas posibles solucións, a conselleira incidiu en que, particularmente, a erradicación do lixo mariño é un dos maiores retos ambientais aos que se enfronta a sociedade actual, sendo os residuos de plástico un dos máis abundantes e presentes en mares e océanos.

“Leva un segundo arroxar un plástico ao mar e catro séculos que desapareza”, advertiu Vázquez Mejuto, quen puxo en valor a importancia de iniciativas colaborativas como Upciclyng the oceans. Así, lembrou que Galicia leva cinco anos implicada no proxecto a través de organismos como a propia Consellería ou a Autoridade Portuaria da Coruña e que en 2022 se conseguiron recuperar máis de 700 kg de lixo mariño das costas galegas.

Nesta mesma liña de protección da franxa costeira, a conselleira referiuse tamén á importancia que terá a futura Lei de ordenación e xestión integral do litoral de Galicia, actualmente en tramitación parlamentaria e en cuxa redacción, tal e como recordou, tamén se tivo en conta o papel dos portos, poñendo o foco na “necesaria interacción” entre os espazos portuarios e as cidades nas que se incardinan.

Por último, a conselleira tamén lembrou que co gallo do Día mundial do Medio Ambiente o seu departamento organiza a Semana por unha Galicia sostible, no marco da cal se prevén toda unha serie de actos que xirarán ao redor do coidado e a protección medioambiental, o patrimonio natural, a meteoroloxía e o clima, e a xestión de residuos.

224 anos da partida de Humboldt

Pola súa parte, o presidente da Autoridade Portuaria da Coruña, Martín Fernández, recordou que hoxe se cumpren, precisamente, 224 anos da partida de Humboldt do porto coruñés, o 5 de xuño de 1799. Por ese motivo, o organismo público organizou xunto co Ceida unha serie de actividades en torno á figura do naturalista prusiano.

O obxectivo é dar a coñecer á cidadanía o legado da expedición, ademais de resaltar a importancia do porto da Coruña ao longo da historia, como punto de partida de misións científicas e comerciais e enclave central na configuración urbana e cosmopolita da cidade. Tamén salientou o traballo da Autoridade Portuaria en favor do medio ambiente, que ten como principal expoñente o proxecto Green Port, que está chamado a liderar a transición enerxética na área metropolitana.

 

Departamentos relacionados

  • Gabinete de comunicación

  • Correo-e: prensa.mot@xunta.es