CMATI

O Consello da Xunta de Galicia, na súa reunión do 26 de xullo de 2018, acordou aprobar definitivamente o Plan Básico Autonómico (PBA) de Galicia, ao abeiro do disposto nos artigos 49 e 50 da Lei 2/2016, do 10 de febreiro, do solo de Galicia e 90 e seguintes do seu Regulamento, aprobado polo Decreto 143/2016, do 22 de setembro.

O Decreto 83/2018, do 26 de xullo, polo que se aproba o Plan Básico Autonómico de Galicia, foi publicado no DOG núm. 162, do 27.08.2018, así como nos catro boletíns oficiais provinciais, en data 28.09.2018 (BOP A Coruña, núm. 186; BOP Lugo, núm. 224; BOP Ourense, núm. 224 e BOP Pontevedra, núm. 188).

Este instrumento de planeamento urbanístico ven a complementar o novo marco urbanístico co que o goberno da Xunta pretende impulsar unha ordenación responsable e sostible do territorio, co propósito de garantir un territorio ordenado.

O PBA é unha ferramenta dinámica que resulta indispensable para plasmar sobre o territorio a complexa realidade da normativa sectorial e dos instrumentos de ordenación do territorio, así como a identificación dos asentamentos de poboación existentes.

Asemade, constitúe o paso intermedio imprescindible para a elaboración dos plans básicos municipais para os concellos de menos de 5 000 habitantes que non contan cun instrumento de planeamento urbanístico xeral, dando así cumprida resposta á necesidade de dotar dunha ordenación básica á totalidade dos concellos de Galicia, co fin de que adquiran plena seguridade xurídica nas accións sobre o territorio.

No que atinxe ao alcance das súas determinacións, o PBA será de aplicación nos concellos que carezan de planeamento xeral e terá carácter complementario do planeamento municipal naqueles concellos que dispoñan del, para suplir as posibles indeterminacións e lagoas do planeamento municipal vixente. Ademais servirá como referencia para a elaboración dos plans xerais de ordenación municipal, cando se considere oportuno.

Finalmente, establece as disposicións xerais sobre os diferentes usos do solo e da edificación que resultan de aplicación común ás súas ordenanzas tipo particulares, que serán incorporadas nos plans básicos municipais en función das características propias de cada concello e das clases e categorías do solo. Asemade, estas ordenanzas tamén poderán ser utilizadas de xeito orientativo, como base ou referencia na elaboración dos plans xerais de ordenación municipal, cando se considere oportuno.

O PBA substitúe ás Normas complementarias e subsidiarias de planeamento provinciais aprobadas no ano 1991.

ACTUALIZACIÓN 2022_12

De conformidade co disposto no artigo 90.4 do Decreto 143/2016, do 22 de setembro, polo que se aproba o regulamento da Lei 2/2016, do 10 de febreiro, do solo de Galicia, e mais no seu propio decreto de aprobación, o PBA debe actualizarse cunha periodicidade mínima anual  en función dos cambios derivados das modificacións das afeccións sectoriais e da aprobación dos instrumentos de ordenación do territorio, por canto constitúe unha peza viva, radiográfica do acontecer normativo que afecta ao territorio da Comunidade Autónoma.

Á vista disto, a información xeográfica do PBA é obxecto da súa terceira actualización mediante Resolución do 15 de decembro de 2022 da Dirección Xeral de Ordenación do Territorio e Urbanismo(DOG núm. 242, 22.12.2022).

Ademais, reformúlase a infraestrutura de datos espaciais do PBA, que pasa a ser un visor cartográfico único, no que se habilitan, entre outros, os seguintes cambios:

• No relativo á información xeográfica que se amosa no PBA, o visor conéctase con algunhas plataformas ou bases de datos de organismos sectoriais que posúen unha infraestrutura de datos espaciais propia, co obxecto de amosar en todo momento a información xeográfica actualizada.

  Por outra banda, mantense a visualización e descarga das capas de información xeográfica vectorial do PBA dende o selector de capas, e compleméntase esta funcionalidade co acceso directo aos seus metadatos e aos seus enlaces de servizos web de tipo WMS.

• No relativo ás series planimétricas do PBA, habilítase a opción de imprimir dende o visor, e de xeito individualizado, as follas en tamaño A3, a escala 1:10 000, de entre as 4112 que abranguen a totalidade do territorio de Galicia.

• No relativo ao catálogo de patrimonio cultural, créase unha nova icona no visor que permite acceder ás fichas dos seus elementos agrupadas por concello.

O contido íntegro do PBA e da súa actualización está dispoñible nos enlaces relacionados a continuación.

O documento completo do PBA aprobado en 2018, así como as súas actualizacións, están dispoñibles para a súa descarga na web do Rexistro de Ordenación do Territorio e Planeamento Urbanístico de Galicia, indicando no campo “Instrumento”: Plan Básico Autonómico.